-
-
کراچی میں سندھ رینجرزاور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کالعدم بی ایل ایف کے لیے فنڈنگ اورسہولت کاری کرنے میں ملوث لیاری گینگ وار کے انتہائی مطلوب ملزم کو گرفتار کرلیا۔
ترجمان رینجرز سندھ کی جانب سے جاری بیان میں کہا گیا کہ سندھ رینجرز اورپولیس نے انٹیلی جنس معلومات کی بنیاد پر بلوچ کالونی کے علاقے میں مشترکہ کارروائی کرتے ہوئے منشیات فروشی اوربھتہ وصولی میں ملوث لیاری گینگ وار سے تعلق رکھنے والے انتہائی مطلوب ملزم کوگرفتارکرلیا۔
بیان میں کہا گیا کہ گرفتارملزم کالعدم بی ایل ایف کے ساتھ رابطہ میں تھا اوران کے لیے فنڈنگ اورسہولت کاری کرنے میں بھی ملوث تھا، گرفتار ملزم کے قبضے سے اسلحہ وایمونیشن اور منشیات بھی برآمد کر لی گئی ہیں۔
ترجمان نے بتایا کہ گرفتار ملزم 2012 میں لیاری گینگ وار کمانڈر بہادر پی ایم ٹی کے گروپ میں شامل ہوا اور لیاری گینگ وار کی تمام سرگرمیوں میں ملوث رہا ہے۔
بیان کے مطابق گرفتارملزم اس سے قبل متعدد بار گرفتار ہو کر جیل جا چکا ہے اور ملزم کے خلاف لیاری کے مختلف تھانوں میں متعدد ایف آئی آرز درج ہیں، گرفتار ملزم پیشہ ورعادی مجرم ہے اور جیل سے رہائی کے بعدمجرمانہ سرگرمیوں میں مسلسل ملوث رہا ہے۔ بیان میں بتایا گیا کہ گرفتارملزم لیاری میں بڑے پیمانے پرمنشیات فروشی کرتا رہا ہے، گرفتار ملزم بی ایل ایف کے 2 ہلاک کارندوں زمان بلوچ، شعیب بلوچ اوردیگرسمیع بلوچ، اوصاف بلوچ اور جمعہ بلوچ کا قریبی ساتھی ہے جنہوں نے 2023 میں قانون نافذ کرنے والے ادارے کے نائیک دلشاد کو فائرنگ کر کے شہید کیا تھا۔
بیان میں کہا گیا کہ گرفتارملزم بیرون ملک لیاری گینگ وار کمانڈر بہادر پی ایم ٹی کے ساتھ رابطے میں تھا اور اس کی ہدایات پر کام کر رہا تھا۔ ترجمان کے مطابق گرفتار ملزم کو بمعہ اسلحہ و ایمونیشن اورمنشیات مزید قانونی کارروائی کے لیے پولیس کے حوالے کر دیا گیا ہے۔
